【524前九件事 —— 從反送中到反國安法，拜托大家最低限度，要將上年五月尾六月頭做過嘅野，搬返出來做一次。】
一、昨晚紅磡天橋擺聯合站，反應係唔錯既，但記得上年五月尾坐監既時候，每日睇報紙就見到勁多聯署、文宣同埋自發街站遍地開花，既然國安法比起逃犯條例痴線十萬八千倍，家陣疫情將近尾聲，想呼籲大家全民街站，大佬網上大家嗌曬救命，好多人可能仲望住昨日跌既股市，街頭數目真係要多過上年六月九日前。
二、無單張唔知派乜？岑敖暉 Lester Shum同埋八鄉朱凱廸 Chu Hoi Dick昨晚砌左份反國安法單張，再三拜托大家拎去印，唔洗問佢兩個架啦，直接download就得：https://bit.ly/2WV1C2R；另外，乜野貼紙周街貼、海報周圍痴，都好需要文宣手足量產，最好Youtube戰線既朋友都幫手，我地用上年暑假既節奏去應對中共接下來既攻勢。
三、仲有跟開教育議題同埋串連學生既鄭家朗 Isaac Cheng都有同我講，近排教育界同學界清算得咁痴線，查實都會激發大家想做野，咁就麻煩各位校友、家長同埋學生，幫手夾辦學團隊表態；雖然聯署好可能今時今日既作用呢，點都無上年五月尾咁震撼，但至少各校反送中關注組，又係時候郁返，尤其係差唔多考完DSE既學生。
四、去到國際戰線，西方媒體社論發功、美國三大報頭條全撐香港、國會議員排隊相繼表態、國務卿正式發反對，國際關注呢兩日返曬來明顯，我同周庭 Agnes Chow Ting接訪問接足全日無停過，從英美加法德韓日，去到印度土耳其以色列俄羅斯巴基斯坦既記者，都問緊我香港發生乜野事。國際線人人都可以參與！即刻入：http://t.me/TwitterHelpBot
五、街頭點搞呢，就大家都明好難畫公仔畫出腸，但我覺得呢個「524遊行前需要解決既四件事」（https://lihkg.com/thread/2030135）寫得非常好，裡面講既幾個問題要傾，而且要盡快聽日前有共識，如果唔係聽日都唔知點好……總之。用唔同方式日間谷人數，至於夜晚就返西方時區一定要用Twitter戰線，呢個週未一定一定一定同國際社會講，香港人會繼續抗爭反擊國安法。
六、無論係「Time is running out in Hong Kong」定係「It is the beginning of the end of Hong Kong」，都係我做訪問時會有既講法，對比起上年都有兩、三個月時間煲起反送中，依家真係極限挑戰，逼香港人未來兩、三星期，從疫情既氣氛，近乎由零開始，唔該大家要將上年五月尾六月頭做過嘅野，搬返出來做一次，仲要做得更好！我地有上年既經驗，應該會谷得更好，快手，盡做。
七、搞成咁，九月選舉有無用？我既答案係：「仲有。」如果仲有投票日既話，無論點DQ，選舉仍然緊要，因為佢確立到國際線同街頭既香港民意基礎同認受性，可能大家身處香港唔覺，但國際一定咁睇。我永遠唔會忘記大學保衛戰炮火連天，唔少記者問我沈默大多數點睇，又話香港人Go Too Far應該反對示威者武力下省五千字……否則會失民心，點知選舉結果贏到開巷，全部質疑批評收曬聲，更唔好講美國總統就係區選大勝三日後簽法案，令《香港人權民主法》 正式生效成為法律；至於制裁，除左若然未報只係時辰未到，大家都明就算制裁鄧炳強凍結西方國家資產，唔代表中共就會立即收回國安法，總之我會盡力同眾志駐華盛頓常委敖卓軒 （Jeffrey Ngo）夾，努力緊。
八、問都唔洗問，全民共識Top Piority，目前最緊要最緊要呢，就一定係要拉倒中共喺香港實施國安法，成數唔高，甚至係低，我知，但上年反送中，大家6月11日，咪一樣有咁既心情，唔係咩？如果睇完以上呢段字，大家都仍然唔太知有咩身位，唔想自己一個做到乜野，歡迎發訊息去羅冠聰 Nathan Law、觀塘願景 - 梁凱晴 Jannelle R. Leung、 張崑陽 Sunny Cheung、何桂藍 Gwyneth Ho既專頁度話想做義工，街站、聯署、文宣、網戰、國際線，大家一定有排忙。
九、最後，想同前日開始 unlike Facebook page，Instagram del相既朋友講，你地洗唔洗驚到咁？驚又好，灰又好，人之常情，我都會擔心，當然有壓力，但洗唔洗去到咁既地步呢……細心諗諗，都知國安法通過之後，頭十個、一百個定甚至一千個清算對像，都無你份架啦，反而我都預左榜上有名，但依家咪又係生勾勾喺香港，打左成篇野比大家睇。唔係講到好有希望，家陣形勢當然差到爆，仲要今鋪國安法，大家都知擺明係要清算國際線，但既然時間無多，就只能兵來將擋，同大家一齊留守香港。
------------------------------------
儘管拉人封艇，取締眾志不再是空談，留一口氣，點一盞燈，拜托大家幫忙延續國際戰線血脈：https://gogetfunding.com/%E9%A6%99%E6%B8%AF%E7%9C%BE%E5%BF%97%E6%87%89%E6%80%A5%E8%B3%87%E9%87%91%E7%B1%8C%E5%8B%9F/
存亡號召，絕不撤退。
Search